Новая пляцоўка бройлернага цэха адкрылася на Віцебскай птушкафабрыцы. Аб’ект каля вёскі Курына – гэта працяг маштабнага плана развіцця прадпрыемства на 2021-2025 гады ў рамках дзяржпраграмы «Аграрны бізнес». Галоўная мэта – мадэрнізацыя вытворчасці, павелічэнне магутнасцяў і зніжэнне выдаткаў.
Хутка ў школу. Традыцыйна, напрыканцы жніўня і летніх канікул настаўнікі паўночнага рэгіёна сабраліся ў Віцебску на абласную педагагічную канферэнцыю. Каб падвесці вынікі работы і вызначыць мэты і задачы на новы навучальны год. Акцэнт – на грамадзянска-патрыятычнае выхаванне асобы. Вялікі педсавет сабраў больш за тысячу настаўнікаў, а калектывы падрыхтавалі прэзентацыі сваіх навучальных устаноў.
Ход уборачнай, работа прамысловага комплексу і нарыхтоўка кармоў. Гэтыя тэмы сталі асноўнымі на пасяджэнні Віцебскага аблвыканкама. Удзел у ім прыняў старшыня Палаты прадстаўнікоў Нацыянальнага сходу Беларусі Уладзімір Андрэйчанка. Дарэчы, нараду па пытаннях развіцця Віцебскай вобласці напярэдадні сабраў Прэзідэнт Беларусі. Нягледзячы на тое, што глабальна Віцебшчына паказвае станоўчую дынаміку, ёсць шэраг праблем, якія патрабуюць вырашэння.
Харчовая і біялагічная бяспека сталі галоўнымі тэмамі нядаўняй нарады ў Прэзідэнта Беларусі па пытаннях развіцця Віцебшчыны. Перад вобласцю стаіць адказная задача – стварэнне біятэхналагічнага кластара. Інавацыйны патэнцыял рэгіёна высокі. Пад Віцебскам зараз будуецца завод, дзе будуць выпускаць айчынную супрацьвірусную вакцыну. І не толькі. Паралельна спецыялісты прадпрыемства «БелВітуніфарм» распрацоўваюць супрацьпухлінныя прэпараты.
Другі хлеб. Аграрыі паўночнага рэгіёна прыступілі да ўборкі бульбы. Самыя вялікія палі – у Талачынскім раёне. Тут паспяхова асвоілі перапрацоўку бульбы – гэта дадатковы прыбытак. Паўфабрыкат «бульба фры» карыстаецца попытам, таму ў гэтым сезоне было прынята рашэнне павялічыць пасяўныя плошчы.
Установы адукацыі напярэдадні новага навучальнага года рыхтуюцца сустрэць вучняў. Завяршаюць капітальныя і бягучыя рамонты. У Віцебскай вобласці першага верасня адкрыюць дзверы звыш трохсот школ. Многія ўжо атрымалі дакумент, які пацвярджае, што вучэбны працэс будзе праходзіць у бяспечных і камфортных умовах.
Камітэт па працы, занятасці і сацыяльнай абароне насельніцтва Віцебскага аблвыканкама сёлета дапамог працаўладкавацца больш як 10 тысячам чалавек. Найбольш запатрабаваныя прафесіі – повары, прадаўцы, рабочыя па комплексе абслугоўвання і рамонце будынкаў і збудаванняў. Атрымаць спецыяльнасць можна бясплатна за некалькі месяцаў.
Якасць валакна высокая. Такую адзнаку ставяць спецыялісты новаму ураджаю паўночнага шоўку. Першыя партыі льнотрасты ўжо паступілі на перапрацоўку. Сёлета у Віцебскай вобласці пад лён адвялі амаль 11 тысяч гектараў. Уборка – на фінішнай прамой.
Сярэдзіна жніўня – час збіраць школьнікаў да новага навучальнага года. Дзе знайсці ўсё неабходнае і як сабрацца на вучобу зручна і выгадна – спыталі парады ў прадаўцоў і бацькоў вучняў. У бацькоўскіх спісах пакупак – адзенне, абутак, галантарэя і канцылярскія прылады. Беларускія вытворцы распрацоўваюць дызайн адзення дзелавога стылю строга адпаведна з нарматыўнымі патрабаваннямі. На паліцы крам трапляюць толькі правераныя – якасныя і бяспечныя тавары, – запэўніваюць прадстаўнікі гандлю.
«Свет дзяцінства». Новы дзіцячы сад адкрылі ў маладым мікрараёне Полацка. Каляровы трохпавярховы будынак, абсталяваны па апошнім слове тэхнікі, прыме дзвесце дзяцей ад двух да сямі гадоў.
